八方之前寫過美國駐港總領事唐偉康話要巡行十八區「視察民情」，之前佢去咗元朗睇自然生態，但估唔到佢跟住去嘅地方越嚟越貼地。
美國駐港總領事館早前喺fb貼相，原來早排唐偉康巡區巡到去深水埗，仲要去一啲連港官都好少去「視察」嘅地方，好似去睇黑膠碟、行街市、行零食小店、食軟雪糕，但最有趣嘅係，唐偉康竟然去埋深水埗地標、最多後生仔去嘅黃金商場！唐偉康似乎對黃金商場好好奇，除咗走去商場入面扭蛋，之後仲揸住粒戰利品同扭蛋機合照㖭（圖）！不過八方就好奇唐偉康手上嘅扭蛋，究竟係嚟自佢身後嘅高達、龍珠定係海賊王扭蛋機呢？
特首林鄭月娥成日話要爭取年輕人支持，黃金商場最多年輕人，唔知佢會唔會好似唐偉康咁入去行個圈呢？