今屆立法會開始，做主席嘅梁君彥似乎繼續唔係好得民主派議員尊重，所以唔少人都只係稱呼佢就「梁議員」，而唔會好似建制派咁叫佢「主席」。本來係相安無事嘅，但噚日梁君彥突然係咁逼民主黨許智峯叫佢做主席。
噚日辯論中止政府個一地兩檢嘅議案，輪到許智峯發言嗰陣，佢如常先同梁君彥講聲「梁議員」，點知梁君彥突然大擺官威，話根據《議事規則》，議員講嘢要企起身兼且係向主席發言。於是許智峯亦企咗起身，叫聲「梁議員」就繼續發言。
被人落咗面嘅梁君彥啲火就嚟，不停講向主席發言要叫佢做主席。許智峯同番梁君彥講，不嬲都叫梁做議員㗎喇。梁君彥直頭想唔畀許智峯發言。許繼續寸梁君彥話「諗吓你零票（當選）先啦！」僵持咗一陣，許智峯廢事再拗，叫咗聲「主席梁議員」算數。