一連四日美酒佳餚巡禮噚晚開鑼，八方當然唔執輸，率先去飲番杯啦！大會今年新增展區「氣泡盛薈」，展商匯悅引入西班牙銀河酒，以西班牙出產嘅白葡萄Airen做酒基，加入食用色素Candurin，啲酒望落閃令令，輕輕搖吓佢仲會變成類似星空嘅效果。
氣泡酒成焦點
隔籬舖匯泉國際就引入日本清酒品牌月桂冠嘅新產品氣泡清酒，分別有原味、青森蘋果同高知縣柚子三款味道，每支會場價40蚊，或者用1張品酒券試飲。負責人尹慧娟話，氣泡清酒近兩年喺日本年輕人圈子相當受歡迎，事關傳統清酒感覺老餅，𠵱家有新意思，更適合開party同朋友聚會。
今年活動前發生小插曲，警方因為安全理由，要求戶外品酒區只用膠杯，好在旅發局「成功爭取」先用得番玻璃酒杯。代理RIEDEL酒杯嘅Town House市場部經理龔文康話，酒杯設計有學問，如紅酒杯杯身同杯口都會相對闊啲，令丹寧有足夠空間接觸空氣，飲落就更香醇啲。膠杯比較窄身，酒同空氣接觸少，影響香氣散發同味道。
美酒佳餚巡禮噚晚仲有兩位司局長「落區」撐場，財政司司長陳茂波同商務及經濟發展局局長邱騰華行孖咇邊行邊飲，其間邱騰華就試咗杯粉藍色雞尾酒，波叔就大玩「執葉」，原來佢只係試緊一款外形特別嘅酒咋！
李八方