意甲球會拉素，有一部份惡名昭彰嘅球迷，奉行新納粹主義，佢哋喺周日拉素主場3:0贏卡利亞里嘅比賽，高唱種族歧視同反猶太人口號，以及喺場上掛上相關橫額。
意大利足總喺周二作出回應，會喺周中各級別聯賽進行賽前默哀，球員亦會手持《安妮日記》閱讀當中一段，要球迷認清史實唔好再錯落去。拉素球員亦以行動支持，周三作客博洛尼亞嘅比賽，賽前着住印有安妮頭像同埋反對反猶太主義字句。二戰時期，年僅16歲嘅猶太少女安妮法蘭克（Anne Frank）死於集中營，留低影響後世嘅《安妮日記》，揭示納粹軍嘅惡行。遺憾嘅係，呢班拉素極端球迷繼續唔生性，杯葛賽會行動喺賽前唔入場，又高唱法西斯主義嘅歌同做羅馬式敬禮。