陳自強離世，圈中藝人深表惋惜，對這位故友恩師留下不捨悼念之情。
謝賢：我都冇見佢好耐好耐好耐，都冇聯絡好耐好耐，鄧光榮走之前，銀色鼠隊都差唔多散咗，大家都要做自己嘢。佢邊日出殯，我喺香港一定去，唔喺香港，都要做個花圈去，梗係最好出現鞠個躬。
盧惠光：我哋識咗咁多年，又成日見面，你問我梗係難接受！我哋之間有好多難忘事，大家識咗三十幾年，要教嘅嘢都教晒，不過得閒又會食飯見面同傾吓偈！早前生日會嗰陣佢好好呀，大家坐埋一齊都已經好開心。
張立基：已經好多年冇聯絡，記得當年有套戲叫《嫁到宮裏的男人》，陳自強推薦我畀白景瑞導演，喺內地拍咗半年，其間陳自強好照顧我，帶我出席好多宴會，佢做過我嘅經理人，聽到呢個消息好唔開心！
戴蘊慧微博貼合照悼念「老竇」：收到陳自強先生離世的噩耗，我震驚。我好後悔為甚麼不懂得珍惜和老人家的聚會。當年老竇簽下只有19歲的我，他對我種種的好，一段段往事全浮出來，我好痛好痛好不捨。
邵音音於Ig貼舊照留言：永遠為朋友兩脇插刀的他。今晨兩點半上床睡覺。最後一夜。永遠把你的笑容留在心深處！
古天樂：吓！咁突然，我都有成年未見過佢，因為工作太忙，我入行就識佢，佢個人好好，特別照顧後輩，佢好健談同樂觀，所以同佢見面時會陪佢傾幾粒鐘。
任達華：佢唔單止係個好嘅經理人，仲真係一個超級超級好嘅人，佢走咗大家都好唔捨得，我哋仲有好多難忘事！