邊個話馬匹只可以喺馬場出現？澳洲神級馬后，已連勝21場嘅「雲絲仙子」，日前就喺澳洲Kyeemagh沙灘，由騎師布文策騎，於大海中的淺灘水中漫步，非常浪漫。
平時我哋喺沙田睇晨操，只見啲馬喺馬場內跑圈，真係你唔悶啲馬都悶啦。外國就唔同喇，會諗諗計幫啲馬搵新鮮感，咁大個沙灘，冇理由唔用喎？如果你係匹馬，有個咁舒服環境，可以休息鬆弛一下，叉完電跑起嚟都爽啲啦。
而且馬腳踩落柔軟嘅沙灘中，對膝頭同腳部壓力較細。浸落海水亦有SPA作用，因為鹽水有舒緩皮膚、按摩肌肉同清潔傷口功效；外國有育馬者發明鹽水SPA機，都係模擬呢個情況。
本周六（28日）「雲絲仙子」將角逐一級賽覺士盾，力求如曹星如般22連勝，今次佢賽前作沙灘訓練，無非幕後希望隻馬喺大戰前夕放鬆啲，舒緩緊張情緒。其實香港都有唔少沙灘，如果定期有沙灘操馬，或者幫香港製造一個新景點都未定。