阿仙奴喺星期二英格蘭聯賽盃第四圈迎戰英冠球隊諾域治，先失守下一路苦戰，結果憑臨完場五分鐘先至後備上陣嘅18歲新星尼基迪亞梅開二度，加時後以2:1奇蹟反勝，晉級八強，尼基迪亞同埋作出「神調動」嘅領隊雲格都應記首功！越級挑戰嘅「金絲雀」開波34分鐘先開紀錄，令主場嘅阿仙奴相當尷尬，當時祖殊梅菲接應隊友嘅直線妙傳，突破阿仙奴防線後單刀挑射得手，半場領先一球。換邊後，心急嘅兵工廠一直施壓希望追平，但係攻極唔入。
頭頂腳踢助阿仙奴贏2:1
直至完場前五分鐘，雲格喺一次角球攻勢前，以預備組小將尼基迪亞入替另一新仔中場尼爾遜，即刻搞掂，只見左角球開出，高基連前柱頭槌跣後，伏兵遠柱嘅尼基迪亞門前快腳篤入，兵工廠追平1:1，兩隊加時分勝負；加時上半場六分鐘，艾利尼喺左路大腳開出角球，尼基迪亞離門四碼力壓諾域治嘅後衞跳起迎頂，皮球應聲破網，阿仙奴反勝2:1，尼基迪亞亦名副其實單天保至尊，成功助球隊躋身英聯盃八強。
車仔棄將 摩佬走漏眼？
作出關鍵調動嘅雲格都好意外，佢話從來未見過一個年輕球員可以咁樣，喺一場咁嘅比賽入面起到即時作用，「我當然知道佢嘅能力，但喺球隊需要你嘅時候又交到貨，呢種質素同能力，喺落場比賽之前係冇人會知道㗎！兩個入波當中我更加鍾意球頭槌嗰球，因為尼基迪亞唔係好高，頂頭槌要好有决心，呢球證明咗佢幾咁希望入波。」
尼基迪亞仲創下一個得意嘅紀錄，原來佢成為阿仙奴第一位喺雲爺爺開始領軍嗰陣仲未出世，而又幫兵工廠入波嘅球員。究竟呢位一夜成名嘅小英兵係咩來頭呢？尼基迪亞之前曾踢過車路士七年，但2015年效力緊車路士U14嗰陣俾人踢走，嗰時執教車路士嘅係摩連奴，唔知關唔關佢事嘞！之後阿仙奴邀請尼基迪亞試腳，唔使一個禮拜就已經用獎學金嘅形式將佢收歸旗下。尼基迪亞加盟阿仙奴之後，同時間喺U18同埋U23上陣，2016/17球季幫兵工廠U18上陣16場入15球，喺U23踢咗26場就入咗12球，都算叫做有少少名氣㗎。