今季英超開始咗未夠三個月，已經有三位領隊冇得撈。三位被炒嘅主帥，有兩個都係荷蘭人，法蘭迪保亞（圖）同朗奴高文；荷蘭足球曾幾何時係球壇名牌，教練同球員都係咁吃香，因乜近年好似冇晒威力，教練難撈，連班所謂荷蘭頂級球員都唔係睇得咁順眼。
迪保亞同高文喺今季帶唔出成績，被炒都係可以理解。「全能足球」曾經係荷蘭響噹噹嘅招牌，但今時今日已經OUT晒，冇進步即係退步，更大件事嘅係國內青黃不接，喺荷甲踢出名堂，以雷霆萬鈞姿態轉投歐洲豪門嘅所謂新星，嚟到先知原來唔係嗰回事，好似曼聯嘅迪比同埋熱刺嘅雲遜贊臣，堂堂荷甲神射手，嚟到英超就唔識入波。荷蘭喺2010同14年世盃先後拎亞軍同季軍，但之後接連無緣16歐國盃同出年世盃，洛賓幾位老將都告別埋國家隊之後，幾時可以翻身真係唔樂觀。
荷蘭教練喺英超都係難撈，高文同迪保亞執包袱之後，今季暫時已經冇荷蘭教頭執教英超球隊，近年嘅雲高爾、艾禾卡特、祖爾同梅倫史甸等，領軍表現都係被彈多，全部被炒魷收場，例外嘅係喺15年再去車路士做替工嘅軒迪克，季尾見好就收走人。朗奴高文算係威過吓，喺修咸頓教波成績唔錯，上季去愛華頓都有成績，但佢買人眼光似乎真係唔多掂，低估賣走盧卡古嘅影響，中場羅致太多同類型球員，亂使錢結果，就係搞到荷蘭主帥喺英超全滅。
文：何西