參與中西區議會山頂區補選嘅兩名參選人，自由黨楊哲安（Jeremy）同佔中十死士之一嘅「2047香港監察」錢志健（阿Ed），投票前夕打埋集郵戰。
早排已到過立法會搵山頂選民、建制派班長廖長江影相嘅Jeremy，食過翻尋味，噚日搵另一山頂選民、金融服務界議員張華峰影相，佢連早排喺馬會食早餐嘅時間都唔放過，搵咗非山頂選民嘅前波士、即係教育局前局長孫明揚合照，佢話孫公至今好照顧佢，話有乜需要都可以搵佢幫手。而3名山頂選民嘅自由黨要員包括田北俊、周梁淑怡同丁午壽，Jeremy已經集晒郵，佢話有信心稍後搵埋棄選嘅山頂選民、新民黨主席葉劉淑儀合照㖭！
代表民主派出戰嘅阿Ed亦唔執輸，搵咗天主教香港教區榮休主教陳日君合照，話陳樞機有為佢打氣，讚佢捍衞香港核心價值、公義及良知，可以令香港變得更美好。