政務司司長「小肥張」張建宗噚日下午現身立法會會議廳，疑似為政府硬推一地兩檢坐鎮打氣，點知獨立議員朱凱廸突然「出招」拖延，令小肥張白行一趟，最終同一班助手，提早返回政府總部開會。而喺小肥張急步回程期間，就遇上工聯會前立法會議員陳婉嫻「截擊」，嫻姐一度捉住小肥張密密斟。
嫻姐喺立法會時都不時同時任勞福局局長嘅小肥張過招，唔通佢卸任後，繼續向對方追數？八方問過嫻姐，佢話主要係同小肥張講一向關心嘅就業問題，讚娥特呢份施政報告吸納咗佢爭取咗好耐嘅建議，包括積極探索點樣畀年輕設計師充份利用深水埗區呢個傳統服裝布藝基地。
嫻姐又話，小肥張雖然趕時間，但都同佢講：「嫻姐，總之有乜嘢你搵我得嘞！」咁識做，難怪嫻姐咁滿意。