這晚（25日）谷草第三場四班1800米，騎練韋達與苗禮德重響合作勝鼓，同樣原籍南非嘅佢哋，以大熱門「快樂神駒」勝出，近七個月內首次合作即有斬獲。「快樂神駒」收復上仗屈居亞軍之失，從而打開今季勝門，單Win及組合獨贏A2分別派20及14元。
眾所周知，這晚有好幾位騎師停賽缺席谷戰，當中包括原本旺過旺角的田泰安。結果由佢騎開兼好開的馬逐匹益下家，第二場「辣得寶」上仗由佢跑第三，今趟換梁家俊即贏，而第三場「快樂神駒」上次安仔跑第二，呢鋪易配45歲老將韋達亦順利取勝，可謂有人快樂有人愁。
今場「快樂神駒」自第1檔起步，沿途貼欄順放，就此無驚無險地帶返終點，小勝0.5馬位，呢匹2.0倍大熱門贏來可謂不費吹灰之力，韋達繼9月20日谷草「狀元才」後，直至今晚才取得個人今季第二Win，不過佢季內仲未於沙田贏過馬。
苗禮德表示今次韋達發揮「快樂神駒」的表現，重現昔日13屆冠軍的風範，他更說：韋達終於返嚟啦！苗禮德又直言雖然「快樂神駒」並非超級馬，但在四班有一定着數，馬兒2000至2200米最合，希望加分後可以繼續有頭馬見面。
第三場前四名有熱有冷，「喜愛自由」、「勁豐裕」及「奇妙星光」順序跑獲亞至殿軍，四重彩派4,535元。