立法會噚日原定係政府一地兩檢議案嘅決戰日，不過民主派奇招突襲，喺阻止政府強搶民意一役上，小勝一仗，但對於主責一地兩檢議案嘅運輸及房屋局嚟講，當然唔係好事啦！呢鋪政府為咗箍實建制派，等佢哋坐定定喺度，真係無所不用其極，除咗鋪天蓋地嘅狗仔隊全天候式嚴密佈防，少不免都要用美食攻勢嘅。
所謂「雞髀打人牙骹軟」，運房局局長陳帆搵人買咗幾打蛋撻去立法會，請議員食時兼請埋陪大家作戰嘅記者。本來請食撻都唔係新鮮事，上個星期特首辦主任陳國基落立會打氣時，亦有送撻打氣，之不過今次就勞煩到月薪約達25萬嘅運房局副局長蘇偉文親自送貨去記者區！
蘇副局一放低啲蛋撻就話明係局長請嘅，當係一份心意，總之辛苦晒大家、大家一齊努力咁話。