全新旅遊專頁，即like籽想旅行： https://fb.com/travel.appleseed
過往國際性車展，電單車品牌的展館往往容易被人忽略，今屆東京車展，YAMAHA可算吐氣揚眉，他們展出超過20款車，當中有6部是全球首發型號。而YAMAHA Future Garage展館更吸引了不少傳媒聚集，皆因他們的展品完完全全打破傳統電單車兩個轆的概念，部部造型又誇張又破格。好似純電驅動的MOTOROiD，它的外形好似可以帶你穿越時空一樣，Cyber到暈。此車當然備有不少人工智能的科技，它會因應不同的電騎士而跟他作出互動。可能問你想去邊？自己載你去都未定。
至於另一部名為MWC-4的概念車，都唔知可唔可以叫佢做電單車，因為佢有四個轆，不過造型同電單車相似，駕駛方法亦類近。以純電推動的MWC-4，加入傾斜多輪車LMW系統，即是透過駕駛者身軀的左右擺動去控制車的轉向，即是有啲似揸電單車咁，但就坐得舒服好多。此外，YAMAHA的研發不單止在車之上，連機械人也唔放過，今屆車展展示MOTOBOT Ver.2。第一代MOTOBOT以電單車冠軍車手羅斯為目標，其實這部電單車包埋一個機械人司機，佢會自己上車揸車周圍去，Ver.2升級版的時速更提升至200km/h，識得揸電單車的機械人，更會自主操控及改變方向、速度，齋賣概念都型到爆。尺碼只有1,100×600×1,130 mm的TRITOWN，係一部純電三輪代步車，駕駛者企上去後同樣利用身體平衡控制速度及方向，好想帶佢返屋企，不過香港究竟幾時先肯改法例放寬呢類電動代步工具呢？
http://bit.ly/2lgW9Te
撰文：許維雅
攝影：廖宏俊