一眾前列騎師如莫雷拉、田泰安及史卓豐停賽，令到這晚（25日）谷草有點蜀中無大將。結果個別季初手風麻麻過江龍騎師，都把握呢個大好時機贏馬，包括第四場四班1000米，郭能替姚本輝馬房服役初出馬「鑽得勁」大熱掄元，這匹超級馬單Win及組合獨贏A1分別派33.5及26.5元。
「鑽得勁」馬主鍾國良另有「雄霸」養於麥菲文馬房，「雄霸」早前不幸在行馬機意外9駒1死8傷事件中受傷，新季仍未出賽，反觀4歲的「鑽得勁」呢場服役初出，賽前做足準備工夫，包括進行過谷草、泥地及田草試閘各一次，唔打冇把握之仗。
為展示贏馬決心，鍾國良今晚搵埋大約10位藝人朋友入場打氣，包括馬海倫、吳業坤、莫家淦、在澳門養馬成績理想的吳國敬等。賽前馬海倫等人並巧遇準備在下一場(第五場)擔任盃賽嘉賓的李佳芯(Ali)，於是大家一齊合照，不過李佳芯卻沒有為「鑽得勁」拉頭馬。
「鑽得勁」從未上陣亦熱到3.3倍，可見質素不簡單，馬兒亦冇令一眾打氣的藝人失望，沿途守在五六位競跑，直路逐步加速突圍贏頸位，成功一出即勝。郭能用行動證明自己放棄騎今場由他贏開的新勝馬「君子精神」，是完全正確的決定。
「鑽得勁」馬主鍾國良表示非常感謝姚本輝，為他挑選此馬來港。賽前姚本輝對他透露，今場馬兒初出熱身性質，但輝哥同時強調即使只是熱身，仍有很大機會取勝，就算今場唔贏，亦預計可在一兩場內取勝，因此鍾國良邀請不少老友入馬場晚宴，很開心可以頭馬拉。
第四場二至四名依次為「和平開心」、「君子精神」及「歡喜」，四重彩派一萬一千幾，乃全晚暫時最冷一場。