話明要同社會connect嘅娥班子，上任後各自出巡交功課，而林鄭月娥嘅處女作施政報告出爐後，亦有時間再落區，噚日就先後到訪觀塘同黃大仙，了解食物銀行運作同到校學前康復服務計劃，點知佢總結行程見記者之時，竟然有「水彈」從天而降，喺同佢約8米距離外「贈興」，但林鄭望一望就繼續講，冇受突發事件影響，警方其後則封鎖現場調查。
照顧基層同教育，係林鄭施政主要關注點，佢噚日下午就喺勞工及福利局局長羅致光陪同下，去咗觀塘一間社福機構了解「食物銀行」運作，同時與受助者同長者傾偈，睇吓食物銀行點樣幫助佢哋。其後則探訪黃大仙一間幼稚園了解「到校學前康復服務計劃」，睇吓計劃如何幫助有自閉症等特殊需要嘅幼兒，表明政府願投放更多資源照顧有需要嘅人。
案件交黃大仙刑事隊調查
佢喺完結行程時，企定定喺慈雲山嗇色園主辦嘅可立幼稚園外見記者，講講吓突然有個載住液體嘅膠袋，喺約8米距離外由高處墮下，現場即時有「嘭」一聲響，當時用英文回應記者提問嘅林鄭即時向上望咗一眼，未覺異樣就繼續發言。林鄭離開後，警員用膠帶圍封現場，並撿走膠袋調查。據知膠袋內嘅液體無色無味，相信係清水。有街坊就話該處過往都多次有水彈由高處墮下，對今次事件唔驚訝，相信有人唔滿意當時太吵鬧喎。消息話案件已交畀黃大仙刑事隊調查第四隊進行調查。