英超換帥如走馬燈，可能都唔意外點解李斯特城主帥奇治莎士比亞（圖）落鑊，「冇成績就係呢個下場啦！唔係第一日出嚟撈啩？」前任雲尼亞里助球隊童話式奪冠都要走，成功護級點會大晒？要怪就怪呢度唔係般尼茅夫，班主維猜一早已經唔當李城係護級球隊，雖然唔奢求第二次稱霸，但至少憧憬緊好似獲得歐洲賽資格諸如此類嘅另一個奇蹟。
小弟唔怪維猜，皆因人之常情，冇理由認命自己係得一季貨仔；身為班主，攞錢出嚟投資，難得奪冠後多咗咁多人關注，fanbase擴大，商機處處，點會由得佢短時間內毀於一旦。自奪冠後，你可以見到李城嘅擴軍策略同以前唔同，或者去年夏天，仲可以解釋因為有額外嘅冠軍獎金、歐聯獎金或轉播費用激增，佢肯掟3,000萬鎊買個施利文尼，但今夏佢一樣肯使，艾迪恩施華個交易雖然一鑊泡，但至少大嗱嗱攞咗成8,000幾萬鎊買咗四至五個新兵，根據統計，佢哋全隊球員嘅市場價值排緊英超第九，但奇治莎士比亞被炒前排緊尾三，後者畏罪落台，家陣聽落就理所當然。
另外，李城上季雖然要喺英超護級，但歐聯竟然殺入八強，四支參賽英超隊伍佢哋走得最遠，所以維猜有種「Nothing is impossible」嘅心態，又絕對可以理解。你聽吓奇治莎士比亞被炒後，竟然連安察洛堤同杜曹呢啲星級教練都同李城扯上關係，就知維猜嘅野心，矛盾嘅只係呢班名帥，又點會睇中你座李城呢？
文：盧卡東尼