娥特落區遇水彈，令貼地之旅被搶fo，但查實佢噚日回應傳媒提問期間，都有一句撻着唔少人。
全國人大常委會基本法委員會主任李飛下月16日會來港主講《基本法》研討會，教育局就發通告邀請各辦學團體，安排屬下中學師生喺校內睇直播惹不滿，教育界立法會議員葉建源噚日話呀，有校長反映校方要填回條向教育局滙報係咪會安排師生睇直播，以及辦學團體屬下有幾多學校參加？葉建源質疑係「假自願」，話有關安排令佢感受到「同政治需要或某些目的有關」。
林鄭落區後見記者時就被問到當局係咪想「洗學生腦」？佢堅持有關安排只係教育局嘅日常推展工作，仲笑言：「冇嘢可以強制，你瞇埋眼咪睇唔到囉！」唔少網民話娥特呢句話好哽耳，強調唔係瞇埋眼就可以當冇事發生。
教育局發言人強調參唔參與純屬自願，唔存在學校受壓問題，至於要簽回條，因為局方計劃為睇播嘅學校提供技術支援，所以想知道數目。