【科技籽：玩物達人】
前幾年每代Casio「自拍神器」數碼相機一推出，就算機價炒到近萬元，都一機難求。不過近幾年，手機的自拍功能越出越強，Casio自拍神器又有冇招式抗衡呢？答案當然係有啦，新推出迷你版自拍神器TR-M11就用上日式粉盒外形，加上特別環形LED燈補光，玩法簡單又特別，定價亦「親民」好多！
既然手機都可自拍，無理由要帶多一部體積唔細的相機出街，Casio就聰明在將TR-M11設計成一個粉盒般大小，放在手袋內都唔多覺！5種粉色機身吸引之餘，揭開機蓋才發現設計的竅妙。
8盞環形LED燈營造不同效果
機蓋上方設有鏡頭，下方則是一個方形屏幕，最特別是鏡頭旁邊圍繞着8顆LED燈，加上屏幕下方的一顆，就可組合出多款不同補光效果，例如8顆全開有嫩膚效果，只亮上3顆及下3顆就可瘦面，亦增強立體度及陰影；不過記者測試時環境太光，補光效果未算太明顯，如果在較暗地方應可拍到官方列出的效果。
半身方形相片方便「po 相」
TR-M11操作非常簡單，揭開機蓋自動開機，只要「直掃芒」，在屏幕上點選相機功能，就可用機旁的快門鍵影相。當然講拍攝規格，TR-M11並不算強，卻勝在設計上特別針對女生自拍及「Po相」需要，21mm超廣角鏡頭設計，自拍時足可拍到半身；相機預設拍攝1比1方形相片，毋須裁剪就可上載到Instagram，用應用程式將影片無線傳送到手機，然後上載都好方便。相機亦強化美顏模式，設有11種專屬美顏設定，除了調校膚色、瘦面、除黑眼圈等基本功能外，新加入除痣及亮眼效果，前者減淡痣的顯眼程度，後者更可拍到水汪汪眼睛，說到這裏，相信有唔少女性已經心動。
Casio TR Mini TR-M11規格
感光元件：
1/2.3吋CMOS（有效像素1,050）
鏡頭：F2.8/21mm超廣角鏡頭
儲存：內置49.9MB＋microSD
屏幕：2.5吋輕觸式
體積：77×82.6×26.6mm
重量：138g
售價：$3,980
實拍效果
自拍神器一出，當然吸引不少愛美的模特兒同Blogger試玩，睇完實拍效果，不知道她們覺得這部機吸唔吸引呢？
【喜歡似影樓燈光】
Angela（模特兒 ig：angelang_1026）
「機身上的環形閃燈同影樓燈光相似，自拍時會見到瞳孔上有圈圈，女生會很喜歡。而且市面上很少有相機能做到類似效果，這是一大賣點。」
【瘦面效果好用】
（右）Elke（模特兒 ig：elketan）
「今次加入環形LED燈，可以配合不同場景使用，例如瘦面燈光或嫩膚燈光，我覺得好好用。」
【小手袋啱晒】
Blue（左，Blogger ig：bluebluebluekwan）
Yan Yan（右，Blogger ig：yanyannnnnnnz）
Yan Yan：「我鍾意機上幾盞LED燈，平時自拍要用iPhone自行打燈，這部新自拍神器可一次打燈。所拍到的相片更是正方形，方便放上Instagram。」
Blue：「這部自拍相機絕對吸引到我，我平時外出多用小手袋，它的尺寸只如一個粉盒，並不阻地方。」
記者：布偉倫
攝影：徐振國
編輯：陳慧玲