美酒佳餚巡禮明日開始，一連四日喺中環海濱舉行。之前警方要求戶外要轉用膠杯品酒，令部份酒商同外界譁然。旅發局噚日就宣佈撤回膠杯安排，到時唔理喺戶外同室內，都可以照舊用玻璃杯品酒。
旅發局節目及旅遊產品拓展總經理洪忠興話，佢哋一直都希望沿用玻璃杯品酒，為降低活動風險，到時會有近100個着制服嘅工作人員喺場內站崗同巡邏，比舊年多七倍，又會在入口抽樣檢查市民嘅手提包同背包，最終警方都同意用番玻璃杯。至於旅發局之前預備咗10萬隻膠杯，洪忠興話𠵱家只用到2.5萬隻，用來派畀持入門品酒證嘅市民，剩低嘅就會留畀其他活動同往後嘅美酒佳餚巡禮使用。
警方回應，主辦機構向警方提出新措施，加強管理有關活動嘅公眾安全同公共秩序，經審慎考慮後認為活動可喺有秩序同安全嘅情況下進行，決定發出臨時酒牌，並再無使用玻璃杯嘅限制。