縱橫影視圈60年的老戲骨曾江，現年83歲高齡仍然未退休，近日拍內地電影《忘憂酒吧》更親身上陣吊威吔，拒絕用替身的他令工作人員佩服；相比近年冒起的一批小鮮肉，演技不如人卻開天索價，曾江的專業態度撼贏小鮮肉，焦姣都勁讚老公：「老當益壯呀真係！」
曾在美國讀書、回港後做過3年建築師的曾江，於1955年放棄高薪厚職加入娛樂圈，當年是圈中少有的高學歷明星，從影逾60年的曾江拍過逾數百部粵語片，當年跟謝賢紅透半邊天。1983年曾江拍無綫劇《射鵰英雄傳》扮演黃藥師，因演技爐火純青被觀眾激讚，1998年更獲邀拍荷李活電影《血仍未冷》，2015年就憑電影《竊聽風雲3》奪香港電影金像獎最佳男配角。現年屆83歲高齡的他老而彌堅，近日在廈門拍攝內地電影《忘憂酒吧》時，竟親身上陣吊威吔。
表現輕鬆
昨日網上流出曾江拍戲吊威吔的相片，網友留言激讚：「80多歲的曾老爺子，親自吊威吔，真的太敬業」、「曾老師一直這麼專業！敬業！」曾江亦在微博轉貼及回覆：「應該的！」
據內地報道指，劇組建議曾江用替身拍攝，但曾江卻表示這點小動作難不倒他，堅持親身上陣，還跟負責綁威吔的工作人員有講有笑，之後被吊上半層樓高的他，更拿着長簫扮鬼臉，表現相當輕鬆。兩年前曾江拍《四個小生去旅行》節目因痛風發作，行動不便要坐輪椅，想不到有痛風的他仍專業吊威吔。
行老來運
本報記者昨日聯絡曾江，但他關了電話，而老婆焦姣被問到曾江吊威吔一事，她接受電話訪問說：「係呀！係呀！係呀！老當益壯呀真係。」問到為甚麼拒用替身？焦姣說：「冇問題吖，佢哋啲武師好安全㗎，佢哋好熟㗎嘛。」曾江是否仍身在內地開工？她說：「佢返嚟一日，聽日又去囉。佢喺裏面好多嘢做呀，佢好忙呀，我都唔知點解佢行老運呀，行老來運呀！」
近年內地市場興旺，紅了一批賣樣的小鮮肉，但有部份小鮮肉卻嬌生慣養，不但演技不如人，更加欠缺專業態度，據聞有小鮮肉拍劇，除大特寫鏡頭親自上陣外，其他場口竟叫導演搵替身代拍，又或者人到靈魂冇到，唔背對白就埋位，以「123456789」敷衍了事，搞到對手發老脾鬧：「咁點做戲呀！」導演馮小剛、爾冬陞和成龍都曾公開狠批過，所以今次曾江拒用替身，堅持親自吊威吔，實在非常專業。
採訪：魯吉
