【add專訪】37歲的樂基兒經歷過和黎明的失敗婚姻後，今年和識了十多年、由朋友變戀人變老公的Ian，勇敢結第二次婚，「我冇諗過咁快遇上另一個，但who knows？」她指兩段婚姻都是因愛而結，不能作比較。樂基兒現時和老公Ian有共同愛好、朋友，閒時會一齊做瑜伽，她更準備開拓自己的健康頻道，教育下一代，當然也想孕育自己下一代，「我會係一個好hip嘅媽咪。」
採訪：林妙萍
攝影：周樂恒
化妝：Wendy S. Lee of Wendy's Workshop
髮型：Hin Wan of IL COLPO
場地提供：Three on Canton
樂基兒今年8月底和拍拖兩年、從事有機食物生意的男友Ian Chu在加州結婚，只有約50人的小型婚禮，身邊都是好友、至愛，樂基兒穿上以色列婚紗品牌Inbal Dror出嫁，一臉幸福在草地上和老公拖到實。
婚禮不能比較
新婚兩個月，樂基兒指婚後生活一切如常，「感覺都係差不多，鍾意一個人，結咗婚，都唔會感覺有乜嘢不同。」她形容婚禮是「Simple，classic and cozy family feeling」，原本想在香港再補擺，但最終決定有這一個婚禮就夠。
2008年，與黎明一樣在美國結婚，當日賭城秘婚，次年被《蘋果》踢爆，問樂基兒兩個婚禮，有何不同？「都好難答，因為第一次其實係冇wedding，所以呢個係我第一個婚禮，係第一次着婚紗，你唔能夠真係比較到，It's just different，冇話邊樣好啲。」向來率真的樂基兒，坦言當日結婚和今次結婚都一樣：因為愛！「當你愛一個人，你就會，做啦，唔會真係話，呢個係婚禮，我要咁咁，咁咁咁，而係為咗兩個人去記住，所以係兩件唔同嘅事。」
有人婚姻失敗一次就患上恐懼症，有人再接再厲誓要再結，樂基兒：「我冇諗過咁快遇上另一個，但有時，你冇得計劃，我同我老公做咗朋友十幾年，從來冇試過拍拖，或者有興趣去dating對方，但who knows？」兩人熟稔到，婚後都是直呼對方英文名，連親密的Baby、Honey那類都沒叫，最大興趣是周末一齊上瑜伽班，間中亦會返峇里洗滌心靈。至於幾時生？「我係open，暫時冇任何plan。」她相信就算將來做大肚婆、媽咪，都會一樣是個時尚hip mom。
新片歡迎取笑
樂基兒拍畢多時的電影《女士復仇》終於下月上畫，她在片中飾飛虎隊成員，打鬥場面自然少不了。她笑言無論面對過鏡頭多少次，在螢幕上見到自己依然有點hold不住，更坦言一邊拍，一邊驚，歡迎大家取笑她，「可能好多年冇拍過，下一套可能要等到70歲。」拍片前有受訓，向來體能不錯，但面對鏡頭始終怕羞，「有些緊張，始終咁耐冇拍過戲，冇拍過動作片，有少少挑戰同難度，當然我放咗full effort，但永遠都可以再進步。火火係一個好有才華嘅導演，希望佢滿意啦。」至於同戲的周秀娜，她就大讚對方好傾，鄧麗欣合作過兩三次，亦有默契。
教育健康
樂基兒一向多瓣數，除了做model、拍電影，亦有投資餐飲、搞過泳衣、首飾生意。近年愛上瑜伽，她正開始做自己的健康頻道，「唔係一間shop，唔係賣嘢，我諗，呢個係偏向教育多啲，當然係一門生意，係賣健康概念，係教下一代你唔使好瘦，點樣健康又have fun，呢樣嘢係我想give back（回饋）社會的。」
頻道上，樂基兒指將有許多不同的健康食譜分享、有機美容貼士、各種workout video，自己和好友也會拍片示範等。
更多精采時尚內容，盡在 http://add.appledaily.com 。