男神金秀賢入伍 盤點必煲作品

男神金秀賢入伍 盤點必煲作品

韓國男神金秀賢入伍嘅大日子,粉絲要到2019年先可以再見到金秀賢嘅新作。

而喺金秀賢入伍嘅日子,粉絲就可以重溫佢嘅作品,當中金秀賢喺電視劇同電影方面都有唔少佳作,喺劇集方面,自然就係佢畀人關注嘅《星夢高飛》,呢齣劇有多位現時當紅嘅藝人出演,除咗金秀賢外,就有秀智、澤演等,劇集於2011年播出,當時一班演員仲好青澀,故事圍繞一間演藝藝術高中嘅學生,追逐明星夢嘅成長故事。

金秀賢演出完《星夢高飛》後,人氣急升,翌年即出演古裝劇《懷抱太陽的月亮》,劇集以42.2%收視成為「國民電視劇」,更令金秀賢事業一帆風順,同時憑劇集勇奪第48屆百想藝術大賞電視部門嘅最佳男演員獎。不過要數令金秀賢發火發熱,被封為男神就非2013年底播出嘅《來自星星的你》莫屬。

《星星》係近年最火熱嘅韓劇之一,劇集更喺亞洲各地都勁受歡迎,同時帶挈兩位主角金秀賢同全智賢勁吸金,當中金秀賢喺《星星》中飾演喺地球上生活400多年嘅外星人,戀上大明星全智賢,劇集令到金秀賢同全智賢事業創上高峰,亦掀起一股《星星》熱。

至於電影方面,金秀賢兩部作品都值得一煲再煲,當中包括《盜賊門》同《3個特攻美少年》,《盜賊門》係金秀賢同全智賢首部合作嘅作品,電影講述中韓十大名盜聯手盜取稀世鑽石嘅故事,當年嘅《盜賊門》喺韓國更創下多個紀錄,當年更打破《韓流怪嚇》成為韓國史上嘅電影票房冠軍,現時紀錄已被《鳴梁》所打破。

到2013年《3個特攻美少年》首次擔正做男主角,挑戰演技,飾演擁有雙重身份嘅朝鮮間諜,佢仲憑電影獲得第50屆大鐘獎嘅男新人獎以及第50屆百想藝術大賞電影部門男子新人演技獎。金秀賢喺《3個特攻美少年》中要同時演繹可愛嘅傻子以及冷酷間諜,金秀賢都能完美消化角色,演技受到肯定。