周日英超簡直係默西賽德雙雄嘅災難日，愛華頓喺主場2:5慘敗阿仙奴之後，到利物浦作客熱刺又係輸得大大鑊，紅軍防線繼續有「水準演出」，1:4輸波而回。洛夫雲繼續搶鏡做最大罪人，其他後防球員都唔好得去邊。紅軍喺今場到達一個唔多想到嘅里程碑，成為歷來第六支喺英超失球到達1,000球嘅球隊（見附表）。咁啱呢個紀錄嘅保持者，就係熱刺。
哈利卡尼喺四分鐘就開紀錄，呢個失球集合晒紅軍守將各自嘅問題，祖高美斯包越位、洛夫雲輕易被傳球笠過走甩埋卡尼、門將米洛列特出迎唔準、祖爾麥迪比包抄不力，造就熱刺入波。呢球亦係英超自92年成立以嚟，紅軍累積失嘅第1,000球。
洛夫雲31分鐘已被換
到12分鐘紅軍失第二球更難睇，熱刺門將洛里斯開生波，洛夫雲喺半場頂漏，卡尼見咁筍就長驅直進助攻畀孫興民建功。利物浦喺24分鐘由穆罕默德沙拿追番粒後，領隊高路普果斷喺31分鐘就將洛夫雲換走，由阿歷士張伯倫入替，形勢一度有改善，但臨完半場又輸多球。紅軍喺下半場再冇反撲能力，56分鐘卡尼再入一球奠勝。紅軍防線救極都冇改善，今季踢咗九場聯賽已經失咗16球，係53年嚟喺頂級聯賽同期失波最多嘅一季，高路普賽後都灰晒︰「今日我哋唔使講前四，𠵱家我哋排第九，我簡直難以置信，但𠵱家我哋確係應該喺所處嘅位置。」
講番周日場波亦有唔少球壇名人到場，包括阿根廷球王馬勒當拿，佢獲贈熱刺會方波衫；而退咗休嘅NBA球星拜恩（Kobe Bryant）亦有撐場，賽後佢仲去咗熱刺更衣室，同卡尼以及領隊普捷天奴等合照。拜恩亦點名大讚卡尼︰「卡尼可以繼續提升，有條件去到基斯坦奴朗拿度同美斯嘅水平。」