每年10月係「國際乳癌關注月」，而今年香港癌症基金會就定於星期三（25日）擧行「粉紅服飾日」。宏利香港大大話話都支持咗香港癌症基金會成廿年，今次就搵來一班高層「粉」墨登場，拍咗條片宣揚關注乳癌。
宏利香港首席行政總監萬士家(Guy Mills)平日官仔骨骨，都幾嚴肅，但話明係粉紅服飾日，就當然要粉紅上身先宣傳到喇。所以Guy都係片中罕有戴上粉紅色領呔，鼓勵大家當日要「粉」住返工支持，而MPF一姐吳智珊（Luzia）就一於化身Pink Lady。
噚日香港癌症基金會仲特登去宏利講talk，教一班女同事點樣預防乳癌，共有60個同事參加。如果大家都想支持下，不妨去宏利Linkedin專頁讚好指定POST，每收到一個「Like」，宏利會捐出50蚊畀香港癌症基金會㗎。
李華華