上周六英超爆出大冷，季初氣勢如虹嘅曼聯，作客1:2輸畀哈特斯菲爾德，爆出9.5倍冷W，亦係紅魔今季英超首敗。領隊摩連奴賽後爆嬲，冇點名鬧連番出醜嘅守將域陀連迪路夫，話全隊都抵鬧，比賽態度仲衰過踢友誼賽，反而怒斥噏得就噏嘅西班牙中場安達靴里拉。
曼聯季初頭威頭勢，開季英超八戰未輸過，不過近排似乎有回落，喺保羅普巴同費蘭尼等中場受傷缺陣下，摩佬被抨擊一味淨係防守踢悶波，估唔到喺上周六作客升班馬哈特斯菲爾德，竟然會吞今季首場聯賽敗仗。
中堅菲爾鍾斯喺上半場傷出，摩佬被迫換入今夏以3,100萬鎊加盟紅魔嘅瑞典中堅連迪路夫，點知就出事，27分鐘湯馬士恩斯殺入禁區喺連迪路夫面前扣右再扣左，之後射門被迪基亞擋出，由阿倫穆爾補射入網；33分鐘連迪路夫再孭鑊，哈特斯門將祖拿斯盧素大腳開到曼聯前場，呢位瑞典守將頂漏，由迪普特列輕鬆過埋迪基亞先射入。
曼聯65年來首負哈軍
下半場曼聯由後備入替嘅拉舒福特追番球，但都係拎唔到分，最終以1:2輸波，65年嚟第一次喺聯賽輸畀哈特斯。摩佬賽後話鑊唔係連迪路夫一個人孭：「今場波踢成咁，要我點名指摘一位球員係唔公平嘅，因為全部球員都踢得咁差。除非全隊都踢得好但得一個人犯錯，我先會批評某一個人。」
摩佬對成班紅魔喺今場波冇火嘅表現更嬲，佢更將矛頭指向靴里拉：「我聽到靴里拉喺賽後話對手嘅比賽態度比我哋更好。當球員都咁講，我覺得佢哋應該全部嚟晒賽後記招自己解釋原因，我甚至懷疑就算係踢友賽，佢哋都未試過有咁差嘅比賽態度，我真係覺得好失望。」
曼城領放哥帥唔敢囂
曼聯連續兩場英超失分，但同市對手曼城就繼續擋唔住，上周六迎戰賽前作客不敗嘅尼，由阿古路、奧達文迪同利萊辛尼各入一球，大勝3:0，八勝一和續踞榜首，同曼聯拉開到五分距離，仲追平埋球會11連勝紀錄。
不過曼城主帥哥迪奧拿就叫大家咪咁興奮：「如果係喺五月領先五分就好重要，但喺10月就冇乜意義。上季我哋都曾經連贏10場，但都係虎頭蛇尾，所以我都係告誡球員要保持集中，踢好每一場波。」