政府暫定明年3.11舉行首場補選，包括九龍西因青政游蕙禎被DQ後嘅議席，唔少民主派均有意染指九西，但咁多民主派爭，只會益咗建制，所以負責協調嘅民主動力就約咗有意出戰嘅人出嚟傾吓，睇吓點樣協調一人出戰。民主動力召集人趙家賢確認佢同「持份者」探討進行初選嘅方向討論，佢稍後會就初選撰寫建議書，睇吓大家有乜意見。
呢個會面有咩「持份者」出席？聽聞游蕙禎、劉小麗、曾健超、民協主席施德來、民主黨單仲偕都有出席，而早前分別已傳民協馮檢基同民主黨區議員袁海文都有意角逐。
八方聽聞民主派都覺得任何人未經協調出戰，都難以攞到民主派跨光譜嘅支持。若成功協調，大家圍內爭完搵一個人做代表，叫做有咗認受性，然後一致槍口對外，集中票源先有機會爭議席。