毛主席有句名言：「牢騷太盛防腸斷，風物長宜放眼量。」
今午（22日）沙田大賽日第五場四班1400米，跑出一匹同呢句嘢有關的頭馬，主角四歲澳洲自購馬「放眼量」來自何良馬房，今場由愛爾蘭籍騎師郭能策騎，以大熱門姿態後上氣走韋達座騎「魅力知寶」，打開本身在港勝利之門，單Win及組合獨贏A1分別派27及14.5元。
天氣明顯轉涼，惟沙田馬場今午卻一直滾熱辣，須知由頭場開始，大熱門直落連勝五場未斷纜，創出近期賽事一項紀錄。
講番「放眼量」來港初期養於方嘉柏馬房，之後轉至何良旗下，今季有明顯改善，對上兩戰一殿一第五，這天再跑四班1400米換上首度執韁的郭能，沿途守第三位，結果「放眼量」窮追不捨下，臨尾一步僅僅以短馬頭位之先，趕過最先透出的「魅力知寶」勝出，帶挈郭能季內首勝沙田賽事。
「放眼量」馬主是化妝品連鎖店卓悅老闆葉俊亨的太太葉鍾佩雲，但葉鍾佩雲這天冇現身，葉俊亨邀請這天「時尚煲呔賽馬日」的嘉賓藝人江若琳拉頭馬，身穿白色晚裝鬼火咁靚的江若琳，由男友「生煎包王子」蕭潤邦扶落樓梯往凱旋門，兩人全程黐到實一實，大晒恩愛。
第五場「魅力知寶」力拼僅敗做二奶，三、四名分別為「全勝姿態」及「勁飛寶寶」，四重彩派7,651元。此場熱門「智愛」閘前退出，部份彩池轉投大熱門「放眼量」當中。