中西區補選倒數約一個月，東華選區兩大熱門各自造勢。獲建制支持嘅校長呂錦強噚日下午喺註明「獨立候選人」橫額前大搞名人戰，獲多名建制派助選，包括新民黨主席葉劉同中西區區議會主席葉永成同區議員陳捷貴等，但葉永成獲邀發言時，竟然拒絕兼提早離場。
葉劉現身時，呂錦強部份支持者興奮尖叫，更有人嗌「葉太支持你呀！我哋要23條立法啊！」葉劉站台後被問到會否再幫手拉票時霸氣回應：「睇吓時間啦，好多人搵我幫㗎！」至於呂錦強會唔會搵民建聯助選？佢話若然助選團隊覺得適當，「大家可以傾」，其實佢同民建聯關係密切，要幫手冇話唔得嘅！
代表民主派出戰嘅伍凱欣則一早喺黨友兼區議員鄭麗琼、甘乃威等陪同下舉行「爭取上環永久圖書館」簽名活動，大搞地區民意戰。伍姑娘話喺區內工作11年，希望憑政績同誠意力爭街坊支持。佢話呂錦強一邊自稱獨立，一邊請嚟多名建制派站台，相信選民分得清邊啲人扮獨立。同區仲有另一候選人劉舒燕。