今年NBA波衫官方生產商由三間轉一剔，未買嘅球迷唔知自己著咩size，同埋新波衫有咩咁特別？今集【體盡NBA】就搵嚟波衫舖老闆黃傑同大家介紹一下呢件高科技波衫到底有咩咁特別，當然唔少得兩位動主播Cathy同Joyce嚟同大家做Model啦！
黃傑：「當然會有好大分別，Nike永遠最尖端，走在最前，例如佢地改良咗個尺碼牌，大家都知佢地有新技術，可以用手機掃瞄。呢方面我覺得好新穎，新波衫Size Tag內藏晶片，用手機嘅Nike Connect App一嘟就可以知道晒隊波嘅最新動態，球員嘅數據同比賽精華，連佢鍾意聽咩歌都一覽無遺。」
除咗科技野，點睇Size都有改變，以前買球衣係用細中大碼，而家用Number，其實48就係心口圓周，寫埋幾闊出嚟 咁大家就更加易揀一件Fit自己size嘅波衫。剪裁方面新波衫都好貼心，好多時以前著背心波衫有個問題，就係球衣經常左右搖擺，而家個設計比較貼膊貼身，咁大家平時舉手射波嗰陣，件衫就唔會浪嚟浪去。而且新波衫比較重，著起唔會感覺輕飄飄，有啲人會覺得三間波衫好輕好飄，唔似波衫，著上身感覺唔好睇，我覺得係關乎潮流文化問題。