沙田馬場今早(21日)晨課有個動態值得留意，就係澳洲騎師「炒飯哥」羅理雅，趁冇馬操空檔嗰陣，走去烽火台，主動搵練馬師徐雨石傾咗好耐，兩人神情認真，似在研究搏殺大計。
睇番周日(22日)沙田日賽，羅理雅、徐雨石只合作第二場四班1600米的「勁嘉輝」，相信今日兩人話題，正係環繞這匹實力馬。
「勁嘉輝」雖然已7歲，且歷來在港只曾一捷，勝出率偏低，但呢匹馬曾12次之多喺三班贏馬或上名，家陣喺四班上陣，仲要負129磅非太重，明顯級數佔優。上仗用黃皓楠全程外疊望空不利，亦衝上第四只輸一馬位左右，反映近態出色。
今次「勁嘉輝」換羅理雅，不但騎功勁得多，賽前人馬曾到草地彈閘，備戰有誠意，加上抽2檔好位，難怪羅理雅今朝咁神心，係都要同徐雨石研究好戰略先安樂啦。