【大坑】陳奕迅（Eason）最近為宣傳國語新碟頻頻曝光，包括幫ViuTV拍攝了一套音樂劇《短暫的婚姻》，結果在網上勁吸like，大家都覺得Eason聲線有感染力。Eason除了唱歌了得，也十分吹得，日前他在大坑開餐，便與經理人甘菁菁（Lisa）及粉麵舖店員吹個不停。
睇歌迷留言
日前晚上大約7時許，Eason和親密戰友兼經理人Lisa在大坑出現，二人找了一間充滿地道風味的粉麵舖光顧。心情勁靚的Eason邊食邊與Lisa傾偈，二人傾得很開心，其間Eason更拿出電話，展示歌迷於網上的留言給Lisa看，一直吹不停。吃了約15分鐘，Eason與Lisa埋單離開，臨走前Eason打了個電話，收線之後，他立刻買外賣，估計是老婆徐濠縈肚餓要食。
等外賣時，Eason與店員一樣傾得手舞足蹈，由樓面到水吧的店員都沒有放過，結果再花多近20分鐘，直至兩袋外賣打包好，他才與Lisa和店員道別，登上一部黑色七人車離開。
陳志發鼓舞
此外，Eason主演的《短暫的婚姻》播映後獲得好評，前晚該劇導演陳志發接受《蘋果》電話訪問，他表示：「真係超出自己嘅意料之外，我哋台前幕後都估唔到有咁嘅反應，真係冇諗過。」
曾經執導電影《點五步》、更憑該片提名金像獎的陳志發，今次是首度挑戰電視劇，他說：「其實今次個製作都好接近電影，但係始終電視台會有電視台嘅制度，而電影個自由度會高啲，不過最大問題都係時間，因為今次拍完要趕出街，所以拍完我哋基本上係冇停，個後製係要好快咁處理，電影係可能有一個充足嘅時間去準備，我都好想做到好似電影一樣，多番啲細節位，但係今次最大嘅敵人係時間，而我特別要多謝編劇莊梅岩同陳奕迅嘅經理人。」
採訪、攝影：徐錦池、吳耀輝、黎沐風