世界各國爭取發展人工智能（AI），外國專家預測，未來30年，大量白領階級職位會消失於空氣中，例如寫稿記者，交易室內嘅交易員，會計部由簿記員到會計主任，銀行Teller，繙譯員等等，都可以由機械人代替，將來嘅中學大學畢業生，唔知有乜工可做。有人話不如叫仔女學習機械人做唔到嘅工種，咁即係乜呢？水喉匠？通渠佬？扎鐵工人？呢啲行業又加薪嘞，明年要求加10%以上，加薪幅度高過大學教授好多。但機械人唔可以扎鐵咩？唔可以通坑渠咩？左丁山頭腦唔靈活，諗唔通。只好見一步行一步，勸一位世姪女以後兩年狂谷體能，多多運動，兩年後畢業去考入境處主任，人工三萬五千以上，相信做到退休都未有機械人代替得到入境官員啩？
上星期打風之夜，碰到一位高官，與佢講起公務員的相對高薪，高官笑說：「唔好高興得太早！三十年前我自港大畢業，入美資大行做trainee，月薪五千幾，老闆係港大師兄，後來在外匯界鼎鼎有名。上工一個月，得政府通知我考AO成功，月薪一萬零五百，於是立即辭職，去做公僕！但留低在銀行嘅同學，二十年前已住中半山豪宅，買遊艇，揸波子，我依家叫做有高薪，但冇佢哋一半呀！贏在起跑線有乜用！」講就係咁講，但高官現在位高權重，舊同學見到佢要沙冧咁滯，威水之處，豈可用金錢衡量！
高官就話世事難料，三十年前佢點會諗到今天身處高位吖，正如諗唔到一位名人之後竟受中止馬會會籍，聽聞已搬出中半山豪宅，令人唏噓不已。所以依家量度三十年後AI機械人是否橫行世界，未必作得準。
打風之夜，馬會會所關門，金融H、左丁山等等幾家人不約而同，到屋苑內中式酒家吃晚飯，酒家逼到爆，遲來冇得食，好多張枱叫白飯，居然係限量配給咁款，部長侍應人人做到面紅耳熱，追白飯就會引來粗聲粗氣嘅回應，乜依家食肆的服務咁差呀？後來望到樓面夥計少，人客多，一望而知就係人手不足，呢度並非陸羽，一層樓有六、七個侍應。此亦係一個普遍性中餐廳問題，廚房唔夠人，侍應唔夠人，洗碗唔夠人，星期一至五晚上人客少，就可應付裕餘，一到特殊情況如打風之夜，酒家就如倒瀉籮蟹。香港目前失業率係3.1%，已達充份就業情況，各行各業都唔夠工人，於是服務態度愈來愈差，若繼續不能輸入外勞，市場必然逐漸出現機械人代替勞工，以前以為此乃天方夜譚，現在既然內地已出現「無僱員超市」，香港遲早都會有無僱員餐廳嘅咯。