十多個心光盲人學校學生，噚日喺立會舉行嘅午間音樂表演，竟然吸引到立法會前主席曾鈺成到場，同現任主席梁君彥仲一齊企足全場欣賞。除咗兩代主席，工聯會黃國健、民建聯元秋蔣麗芸、自由黨批發及零售界議員邵家輝等都有出席。邵家輝話，佢每次午間音樂會都會捧場，今次係第一次聽心光學生唱歌，學生演唱由視障歌手蕭煌奇撰寫嘅《你是我的眼》最令佢感動，而由小朋友領唱嘅《You raise me up》亦都聽到佢眼濕濕。至於元秋唔使問都知佢最鍾意《中國人》喇，學生演唱時佢唔只拍手歡呼，仲跟住學生一齊高歌，唔講真係以為佢有份表演。