八方身為港人都冇機會環繞香港島游番一圈，但有位居港英籍男泳手Simon Holliday（圖）就計劃下月11日挑戰成為本港史上第一人，環繞香港島不停站游45公里，全程預計約15小時至18小時。有13年長途泳經驗嘅Holliday希望借今次活動，為自己創辦嘅慈善機構Splash Foundation籌100萬元，幫本地5,000名弱勢兒童、難民同外傭提供免費游泳課程。
39歲的嘅Holliday出生於英國海邊，4年前移居香港，曾喺2011年橫渡英倫海峽，後來2014年由香港游到澳門，兩次挑戰都分別游咗約30公里，但今次環島游全程係長多15公里，當日凌晨3點由西環泳棚出發，途經維港、石澳、鴨脷洲，最後返回西環，其間每小時會有食物補給。Holliday話今次係佢曾游過嘅渡海泳中距離最遠嘅一次，非常有挑戰性。Holliday嘅教練Henry Wright亦話今次渡海泳嘅時間甚長，係艱難嘅渡海泳任務。