立法會放暑假之前，內務委員會就選出7名議員加入譴責周浩鼎議案成立嘅調查委員會，負責調查民建聯周浩鼎被指勾結前特首梁振英干預立會UGL專責委員會。當時建制派明言因為怕公民黨法律界郭榮鏗嘅法律專業知識，同埋火力太猛對周浩鼎不利，決定踢走郭榮鏗，投咗票畀建測界嘅姚松炎出任委員。點知，政府DQ議員令姚松炎失去議席，就連譴責周浩鼎議案調查委員會個位都要補選。立會內務委員會噚日就討論填補姚松炎嘅席位空缺，建制派今次冇再阻撓，郭榮鏗喺冇競爭之下自動當選譴責周浩鼎議案調查委員會。建制派今次任由「重炮手」郭榮鏗加入委員會，唔通係決定唔再保鼎？