愛華頓周四晚喺歐霸盃E組又遭遇挫折，主場以1:2輸咗畀法甲嘅里昂。領隊朗奴高文今仗冇將朗尼納入比賽名單，開波只係五分鐘，客隊就得到個12碼，馬些路安東尼奧喺禁區入面俾主隊後衞賀基迪勾跌，球證直指12碼點，極刑由費基亞操刀得手，愛華頓半場落後0:1。易邊後，愛華頓後衞艾殊利威廉斯推撞里昂門將安東尼盧比斯，搞到兩隊球員衝突，仲有至少一名主隊球迷乘機向里昂球員「抽水」，睇怕歐洲足協（UEFA）之後會跟進調查。被黃牌警告嘅艾殊利威廉斯三分鐘之後以頭槌破門，幫愛華頓追成平手。不過，里昂喺75分鐘又再度超前，貝特蘭查奧爾喺小禁區入面好巧妙咁用後腳射門得手，幫客隊贏2:1。愛華頓輸波之後，喺E組三戰得一分排包尾。同組另一場賽事，阿特蘭大喺主場以3:1贏咗阿波羅利馬素，暫時三戰得七分排榜首，里昂就落後兩分排次席。