中國體操隊今、明兩日會聯同香港體操隊喺伊利沙伯體育館表演，慶祝回歸20周年，一眾表演運動員同奧運金牌代表鄒凱、何可欣及李珊珊前晚已抵港，噚日出席發佈會，香港「跳馬王子」石偉雄同「吊環王」吳翹充都會一齊表演，但就話表演內容要保持神秘感。
今次嚟港獻技嘅中國隊運動員包括張成龍、啱啱喺世錦賽高低槓成功衞冕嘅范憶琳同商春松等，而香港代表有黃曉盈、石偉雄、吳翹充等。唔少名將都有接受訪問，曾五奪奧運冠軍嘅鄒凱講番舊事，佢就話遺憾直到退役時都練唔好吊環；而李珊珊退役後更加出咗一本自傳。表演憑票入場，市民亦可透過fb專頁NationalGymnasticsExtravaganza睇直播。
石偉雄首次同中國隊合作表演，佢話：「我哋會先做聯會匯演，再作單項表演。」但就唔肯透露會做咩動作：「要保持神秘感！」明年係亞運年，石仔喺上屆仁川亞運得到一面跳馬金牌，將衞冕嘅佢話：「明年會減少比賽，希望做多啲有效集訓。餘下時間唔多，會盡力備戰。」
