世間人有相似，近年好多人就持住個樣同某啲名人太似，扮對方博出位，又真係令到佢哋佔到啲便宜，甚至賺到商機。扮運動明星嘅近年都一大堆，好似A貨費爵爺、翻版美斯乜都有，最近美國嗰邊，就有位Youtuber扮勇士球星K湯遜，周圍幫人簽名，仲揸埋架車入球員專用嘅泊車區都冇人覺得有可疑，係咪真係咁似先？
呢位Youtube頻道BigDawsTV嘅創辦人Daws，喺勇士周二對火箭前三小時，著住K湯遜件勇士球衣周圍「招搖撞騙 」。佢個樣同K湯遜真係幾分似，只係身形肥少少，結果街上好多人都真係誤會佢就係K湯遜真身，同佢自拍又攞簽名，而Daws亦幫自己set咗任務，就係魚目混珠咁避過班保安，揸車闖入球員專用嘅泊車區，結果真係冇人發現佢係A貨，畀佢成功過關，之後就大模斯樣咁走入場內睇波！
不過，Daws其實已經唔係第一次扮K湯遜，上季總決賽對騎士時已經扮過佢入場，所以今次似係一早聯絡好晒，做場show畀大家睇完開心啫！