隨住狼去娥上，有冇發現政府對「帶路」嘅關注度不及前朝？娥班子反而積極推動大灣區，更設辦公室推動，可見係呢屆政府重中之重。而呢個方向都同本港財團外資睇法一致，因為相對「帶路」，大灣區似乎更有肉食，自然捨遠取近。有政界中人話一帶一路肯定俾內地企業擸晒，就算做融資，香港實際利益都唔算大，但大灣區呢個project就好貼身，除港、澳外集合9個內地城市，正好係大珠三角地區主要嘅機場同港口群，加上中央催谷，單做交通物流已經好和味，加上金融科技等係香港強項，難怪要及早霸定靚位。據聞陸續有外資開新位，請專人研究大灣區有乜發達位；有政界中人都話呢排頻頻向大企業講解大灣區進展，「大灣區」呢3粒字越嚟越值錢！