之前話利物浦嘅沙迪奧文尼（圖）要養傷六周，但塞內加爾國家隊一樣徵召呢位翼鋒入隊，踢下個月嘅世盃外圍賽，教練阿里奧施斯仲講到話文尼到時會100%fit，係咪即係代表佢應該可以提早復出，替利物浦披甲先？文尼喺今個月代表塞內加爾踢世盃外圍賽時拉傷腿筋，確診要唞六周，但嚟緊國家隊會同南非喺11月再踢兩場生死外圍賽，文尼竟然繼續出現喺大軍名單中！教頭阿里奧施斯就咁講：「毋庸置疑，佢會同我哋一齊應付呢兩場比賽，佢會100%fit。我知佢已經復操緊，好似跑直線呢啲簡單個人操練，而下個禮拜啲操練強度就會更勁，然後就可以練波。」阿里奧施斯講到真嘅一樣咁，睇嚟文尼真係有機會提早回歸，但報道就話佢應該會踢完國際賽後，先再替紅軍披甲。