雖然練馬師大摩喺13駒出戰嘅二級賽沙田錦標中，諗住用六匹馬圍城，強佔呢個獎盃返屋企，但係已經慢慢復蘇嘅告東尼又點會咁易俾佢得逞，佢個人都幫旗下馬報名出戰四駒，為「美麗大師」、「大印銀紙」、「勝得威」及「醒目名駒」，起碼喺數目上，唔會輸蝕俾大摩先。
其實呢個本港名倉已經連贏三個賽日，而勝出馬嘅賠率越嚟越熱，反映幕後已經對自己出戰馬充滿信心。
不過一場出咁多馬，馬迷或者會覺得，告仔自己都有啲偏心馬出現，不過佢真係冇咁做，四匹大賽戰馬經過隧道時，都鉅細靡遺睇一次，其中「大印銀紙」見到告仔仲上下不斷搖晒頭，似向自己練馬師打招呼咁，場面相當有趣。
呢場告摩之爭將會喺周日（22日）第八場上演，相信會有一場龍爭虎鬥，馬迷又點可以錯過。