賓架D召開飯局，點知又要飛去馬拉開會，於是臨時叫左丁山做主持。賓架D上星期先至去咗吉隆坡兩日，點解今個星期又去呢？如果係傾生意就幾好景噃，但同佢好熟嘅公子L就話：「去上堂就真，賓架D做咗馬國一間銀行董事，彼邦要求銀行新董事要上董事課程嘅，好似香港啲醫生、會計師、律師久唔久要上堂積累培訓分數咁，故此佢去吉隆坡學習啫，你估好好玩咩！」以賓架D嘅豐富經驗，叫佢做課程導師，根本唔駛備課，依家做「學生」喎，教師會驚咗佢！
在吉隆坡有乜好玩吖，食嘢又麻麻，每次落機就去開會上堂，第二日亦如是，跟住就去機場回港準備返工，邊度有興趣及時間去玩樂噃。公子L就唔同，啱啱放完假，原來走咗去伊朗遊覽，得到極佳印象，佢話一世人第一次去，發現三千年波斯文化，果然不同凡響，到處係古蹟，人民對遊客態度極友善，識講英文嘅會主動行埋嚟selfie，仲邀請佢地回家試伊朗茶點㖭。唯一不足之處就係餐廳燒烤，燒雞牛羊肉，但唔准飲啤酒解熱，香港人幾容易熱氣喉嚨乾。
公子L話：「我都唔明白特朗普點解對伊朗咁惡死，視伊朗為大敵，去完伊朗返嚟，聽埋特朗普單方面不確認伊朗核協議，我多咗一分反美，一分親伊㖭！」左丁山立即提醒公子L，拿特區護照去伊朗，係好多香港人所為，去美國就轉用澳紐加英護照，以免俾美國移民局人員睇到伊朗入境處蓋印，多多質疑。但特朗普上台後，入美國遊客無論揸甚麼護照，要主動申報（declare）有無去過伊朗，俾美國移民局知道講大話就死火；如老實申報，會有乜後果？咁又唔知噃，主動權在美方。公子L話：「算吧啦，我唔鍾意去美國旅行嘅……」
公子L真識嘆，去完伊朗返嚟又立即在周末飛去台中聽音樂，識貨到極。飯局中人有追數王，佢亦去過伊朗遊覽，觀感甚佳，讚不絕口，兩人同聲話會再去伊朗一行。咁講法，伊朗之波斯文化確有迷人之處，好幾個朋友去過伊朗都甚有好感。追數王近來又去過柬埔寨，導遊帶佢參觀萬人塚，當年赤柬殺自己人絕不留情，數以萬計屍體成為白骨，睇見就驚心動魄，知識分子領導赤柬，手段比文盲農民還要狼毒千百倍！追數王話佢見過不少年輕柬埔寨人，大多數對赤柬無甚知識，又懶得追查，最緊要係取得月薪五百美元，成為幸福高薪人士。