中西區議會兩個議席補選11月26日先舉行，但大戰已經一早展開，好似東華選區咁，除咗民主黨伍凱欣（Bonnie）想為個黨搶番原有陣地，亦有建制派支持嘅新會商會學校校長呂錦強，以及前工黨成員劉舒燕加入戰場。
而Bonnie噚日就喺白鴿黨中西區議員甘乃威同鄭麗琼陪同下，向選舉主任請願，指上屆區選東華選區其中一個票站係對手呂錦強所屬嘅新會商會學校，若然學校今次再做票站，會令對手涉及潛在利益，加上學校位置對半山區選民唔多便利，希望當局另覓票站。
八方打探過，由於該校欠缺無障礙通道，相信今次補選唔會做票站，Bonnie可以放心嘞！而積極備戰嘅佢噚日更獲黨友、深水埗區議員袁海文晨早陪開街站打氣。