法甲豪門巴黎聖日耳門（PSG）周三晚喺歐聯B組分組賽大開殺戒，憑前線三叉戟尼馬、卡雲尼和基利安麥巴比各入一球，作客比利時以4:0大勝安德列治，繼續喺分組賽保持全勝兼不失一球。作客嘅PSG今仗開賽僅三分鐘就打破主隊防線缺口，基利安麥巴比接應隊友直線傳波，喺禁區內右輔位置窄位抽射破網。44分鐘，尼馬喺禁區頂施射，安德列治門將雖然勉強擋出射門，但皮球彈高後，基利安麥巴比頭槌二傳門前嘅卡雲尼近門頂入，客隊半場兩球在手。易邊後，PSG喺66分鐘再添入球。尼馬喺禁區頂偏左位置主射罰球，皮球喺近柱位置入網。PSG喺完場前兩分鐘再有後備上陣嘅迪馬利亞單刀挑射得手，最終以4:0大勝一場。