巴塞隆拿前鋒美斯禮拜三晚喺歐聯射入罰球，幫球隊喺主場贏奧林比亞高斯3:1，同時亦都取得職業生涯第100個歐洲賽入球。美斯今場喺61分鐘主射罰球得手，繼皇家馬德里前鋒基斯坦奴朗拿度（C朗）後，成為歐洲足球史上第二位喺歐洲賽入到最少100球嘅球員。美斯家陣喺歐聯有97個入波，另外三粒就係喺歐洲超級盃射入嘅。
疑似食葡萄糖補充體力
入咗第100個歐戰入球，固然可喜可賀，不過佢喺開咗波大約10分鐘嘅時候被影到神神秘秘咁喺自己隻襪度疑似拎咗啲嘢放入口，到底佢食咗啲乜呢？
相信大部份球迷都唔知美斯食咗乜，但有一位叫托爾克馬達嘅西班牙記者就自稱知道係乜嚟，佢話美斯食嘅係一種葡萄糖藥丸，喺比賽踢咗10至15分鐘嘅時候食就最好，因為呢個時候體能消耗未係好大，係肌肉吸收葡萄糖補充體力最好時間。到底係咪真係葡萄糖丸，暫時唔肯定；但比賽期間食藥補充體力，又係咪違規呢？
