外號炒飯哥的羅理雅呢排有番晒鑊氣，對上兩次賽事都起孖後，這晚（18日）谷草頭場五班1200米，羅理雅即爆冷Win，夥拍何良馬房「賞面」後上絕殺落飛黨啡燈馬「金威利」，個人累積連贏三個賽日；「賞面」打開轉何廐後勝門，單Win及組合獨贏A2分別派151.5及20元。
七歲馬「賞面」原於蘇偉賢馬房受訓，左前腿外側小掌骨中心曾骨裂，兩年前由柏寶贏谷草C欄五班1200米開齋，上季轉至何良旗下，今仗賽前在何廐跑過三場零獎金。不過今次換上首度策騎的羅理雅，人馬第一時間擦出火花，留前鬥後沿途守四五位，末段追過末段一度突圍的5.7倍啡燈馬「金威利」，馬兒重響勝鼓。而「金威利」出擊失手做二奶，落飛黨在獨贏彩池的約200萬注碼輸晒。
何良、羅理雅今季只合作過「祥勝駿駒」、「賞面」共兩次，結果全勝。何良表示一直很欣賞騎師羅理雅，覺得對方很紮實，不是一位太高姿態的好騎師，今仗羅理雅做足100分，完全依足策騎指示，如果他只做了99分，恐怕也輸掉了。
除了騎師出色發揮，何良補充「賞面」今場贏在賽前改變了操練功夫，加上除頭罩，對馬兒發揮有很大幫助，不過下場升上四班負輕磅，羅理雅未必可繼續主㘘，或影響爭勝機會。
今場第二至四名順序「金威利」、「喜盈盈」及「贏馬神器」，四重彩派三萬蚊多啲。