中乙球會大連博陽上月被千兆集團收購，集團入面有位年僅22歲嘅女董事王俊奇（中），樣生得好標緻，笑容甜得嚟又親切，做咗球會總經理後，成日出現喺球場同啲球會公開活動上，受到大批網民關注，早前仲幫球員開生日party，內地傳媒呢排亦經常報道有關佢嘅新聞，一間中乙球會，家陣關注度分分鐘勝過中超球會。
王俊奇唔係得個樣，平時受訪對答如流，「千兆搞足球嘅決心好堅定，雖然我哋好新，但想為大連足球帶嚟突破同貢獻。我哋決定三年內衝向中甲，然後五年內就上中超。」大連博陽喺啱啱踢完嘅中乙球季只排第17位，但佢哋最近已經搵到前中國國腳姜峰做教練，希望實現到升班大計。