特區政府要全方位協助推動特首林鄭月娥嘅首份施政報告，換言之全民皆兵，就連政治助理，都冇得左閃右避。八方之前都寫過，娥特已經落咗柯打，叫政治助理入學校，幫忙推銷施政報告內有關年輕人嘅政策。
據知唔少政助都已選定自己母校為首個落腳點，有政助仲揀咗幾間學校，睇吓最終去邊個。但去邊度都係其次，屆時要講啲乜、又或者可以講啲乜，先至最重要，尤其部份政助未必經常做公開演講，遇有部份唔關施政報告嘅挑機問題，點樣回應真係好關鍵。
講到如何講咗好多嘢又唔出事，政務司司長張建宗肯定係專家，加上佢喺娥班子下係「統籌王」，據聞佢為一班政助準備咗briefing session，親自教路，咁鬼勤力難怪一直襟撈。