歐聯H組周二上演「入球王」大戰，皇馬嘅歐聯入球王基斯坦奴朗拿度（C朗）係主場擺下擂台，迎戰自九月起不停士哥嘅熱刺前鋒哈利卡尼。結果係點？咪同賽果一樣打成平手囉，各一言和，兩隊同得七分並列榜首。
開賽僅四分鐘，一向要威嘅C朗先係主場嚟個下馬威，但頭槌攻門中柱唔入，即時仰天長歎；之後輪到卡尼發威，熱刺後衞奧里亞右路傳中，卡尼衝前搶點想施展「虎尾腳」，雖然踢唔中個波，但都嚇到回防嘅華拉尼擺烏龍。但係身為金球獎大熱嘅C朗，又點會咁易俾皇馬輸波，完半場前卻奧斯博到12碼，C朗當仁不讓咁射入。
呢個入波唔單只為皇馬搶番一分，仲令到C朗喺歐聯射手榜追上卡尼，同以五球並列榜首，亦將自己喺歐聯歷來嘅入球紀錄增至110球。今次佢哋兩人平分秋色，下輪分組賽輪到熱刺喺主場溫布萊出擊，到時兩大射手又再互撼。