球圈有謂好波不如好運，跑馬又何嘗唔係？
好似毛里裘斯籍騎師田泰安咁，這晚（18日）谷草第六場三班1200米夥拍沈集成馬房「好益善」上陣，此駒雷神日前操過唔騎，田泰安冷手執個熱煎堆，後上一攻而破，既幫座騎打在港勝門，帶挈埋落飛黨扑中4.7倍綠燈Win，組合獨贏A2派24.5元。
六歲澳洲自購馬「好益善」第28次在港出賽初配田泰安，終於首嘗勝果，此駒沿途守第九位，轉彎田泰安兜大圈蝕位上前，仍衝贏對手，小勝0.5馬位，沈集成一連三次賽事都有馬贏，亦係佢季內首度用田泰安搏殺得手。
今晚田泰安暫時已贏「旅英公爵」、「豐盛人生」及「好益善」，未完場已大演帽子戲法，做硬騎師王咁滯。
沈集成多謝「好益善」馬主願意給予耐性，十分支持他的馬房，此駒入直路多數會內閃，上場配蔡明紹若非內閃，理應不止跑第二而應勝出，原本今場搵莫雷拉騎，不過他要策「馬功臣」，所以由田泰女接手。沈集成大讚田泰安發揮得很好，賽前叫安仔睇晒「好益善」過往出賽影片，以了解馬性。
沈集成表示「好益善」有四級喘鳴症，上季尾做過手術，情況雖然慢慢好轉，但始終有喘鳴底子，不想馬兒太辛苦，所以會安排他主攻1200米，加上一哩對手比較強，因此1200米較易偷襲。
第六場二至四名順序為「育馬妙星」、「馬功臣」及「飛星凱旋」，四重彩派一萬二千幾，三T正獎有人中，每注派160萬多啲。
值得一提，「馬功臣」累積四次在港出賽都由雷神壓陣，結果統統大熱倒灶，名次非三即四，單係獨贏投注已經輸咗馬迷總共幾千萬蚊。